أحمد سعد
اللجوء إلى كندا.. لا تصدق كل ما يقال لك
أحمد سعد
بالنسبة للتسعين مليون بوست اللي عملهم الشعب المصري للاحتفال بأن كندا أقرت اللجوء للمصريين.
خليني أقولكم على حاجة صغيرة كدا، قبل ما تجهزوا الشنط.
مبدئياً حاجة غريبة جداً إنك تلاقي واحد حاطط صورة السيسي وكاتب يلا نروح كندا.
كندا فتحت باب اللجوء مش الهجرة.. والحق في اللجوء فقط لمن يستطيع أن "يُثبت يقينا" أنه تعرَّض لواحدة من تلات حاجات في مصر:
- التعذيب
- خطر حقيقي على الحياة
- خطر حقيقي من العنف أو معاملة غير عادلة أو عقاب
التلات حاجات دُول عشان تِثبِتهم "حسب كل اللي اعرفهم عملوا لجوء.. وهم كُثر" مش بالبساطة اللي انت متخيلها.
انت محتاج ورق قضية مثبت فيه اسمك بنفس شكله في الباسبور.. محتاج صورة ليك مثلاً أو فيديو وانت بتتعرَّض للخطر.. محتاج خبر في صحيفة بيشتم فيك مثلاً أو بيهدِّدك.
وحتى لو معاك كل دول هتاخد برضو سنة بالميت بعد القانون الجديد.. واللي يعرف حد عمل لجوء في السويد (أسهل لجوء في أوروبا) يعرف أنا بتكلم على إيه.
معاك كل دول؟ وواخد حكم وأحمد موسى شتمك في حلقة.. لسة ولا حاجة حطهم.. فجيبك
نيجي للنقطة الأهم واللي محدش اتكلم فيها معرفش ليه.
اللجوء اللي كندا فتحته ده هتلاقي اللينك بتاعه على موقع الهجرة مكتوب في عنوانه
" claim refugee protection from inside canada"
يعني طلب اللجوء من داخل كندا
يعني جاستن ترودو مش هيبعت طيارة تاخد معاليك من مصر.. والطيارة مش هتعمل ترانزيت في إسطنبول عشان تاخد معاليا كمان معاها.. لا.. المطلوب بوضوح إنك تكون موجود داخل كندا، وكاتبلك على الموقع إنك محتاج فيزا سياحة أو دراسة عشان تدخل كندا.
مش عايز أعقدكم، بس فيزا سياحة لكندا هي أصعب فيزا في الكون.. أه أصعب من أميركا ومن الشينجن بتاع أوروبا طبعاً.. بل أصعب من فيزة إنكلترا الوهمية، عشان بس ما تقولش لا هعرف اطلَّعها وانت نافخ صدرك كدا، خليني أقولك إن المحامي التركي اللي بتعامل معاه في قصص الهجرة واللجوء مثلاً بينصح إنك عشان تعمل فيزا لأميركا (اللي هي صعبة نسبياً) محتاج شينجين دخول وخروج مرتين لمكانين مختلفين ولسياحة حقيقية.
يعني محتاج فيزا شينجين لفرنسا أو إيطاليا (اللي هي المفروض سهلة نسبياً) وبعدها تروح تعمل سياحة أسبوع وترجع لمحل إقامتك.. وبعدها بفترة تعمل فيزا تانية لألمانيا مثلاً.. ونفس القصة.. وبعدها بفترة تقدم على فيزة أميركا وفرصتك ممكن تكون كويسة بعد مرتين تلاتة تقديم ورفض، إيه علاقة كندا بأه بالكلام ده،
علاقة كندا هي إني أعرف واحد عمل كل ده، وأخد تأشيرة أميركا وراح وجه كذا مرة.. واترفض في كندا عادي.
أو زي المذيع الغني اللي لف الدنيا وحط مبالغ في حسابه قبل ما يروح ويترفض من السفارة الكندية في الدوحة عادي.
طبعاً مش محتاج أقول إن فيه شباب معتبرين نفسهم "رجال أعمال" عشان معاهم خمسين ألف دولار في البنك مثلاً، راحو واترفضو برضو عادي، بل في واحد فيهم اترفض وهو عنده فرع صغير لشركته في كندا.
اللي أعرفهم شخصياً عرفوا يطلعوا تأشيرة كندا الخرافية دي كانوا اتنين فقط،
والاتنين راحو بصفة أساتذة جامعيين، وقدروا يجيبوا دعوة من جامعة هناك.
من الآخر كندا عارفة هي عايزة مين يروح
........
اللي خلاني أكتب البوست ده، هو إني لقيت صفحة تعبانة مشيَّرة خبر كندا، وبتقول منشن لصاحبك اللي هتهاجر معاه، والعيال داخلة تمنشن بعض بالآلاف وتحلم بالعيشة النضيفة.
والصفحة عمالة تعمل إعلانات وتاكل عيش على أحلام الشباب.
الحلم مش عيب.. بس أما ألاقي واحدة ست حاطة صورة السيسي وداخلة تمنشن ابن أخوها يبقى الموضوع مش منطقي.
حاجة كمان أخيرة
عارفين السوريين وصل بيهم الحال لإيه عشان يوصلوا كندا؟
أخدوا سفن بتعمل رحلات للقطب الشمالي من فنلندا.. وفي الرحلات دي السفن بتعمل استراحة على جزيرة تابعة لكندا.. وهناك قاموا طالبين اللجوء.. واللجوء بيكون للولاية اللي تابع ليها مكان الدخول.. يعني في الآخر فضلوا قاعدين في الولايات الشمالية المتلجة.. معلش أصل لقيت واحد معلق على منشن لواحد صاحبه بيقوله أنا عملت سيرش ولقيت مكان حلو اسمه فانكوفر.. فانكوفر ايه ياللي تِنْشَك في باسبورك.. دي أغلى مدينة في العالم.